Ætlanin at koma heimaftur brestur ofta

Eitt er menningin, sum ein útbúgving hevur við sær. Men eitt annað er sosiala menningin, ið kemur av at búgva langt heimanfrá.

Júst sosiala menningin er ein av orsøkunum til at Beinta Gaardbo og Sólja við Stein ætla sær av landinum.

-Ein lærir at standa á egnum beinum tá ein flytur út frá foreldrunum, og kanska á ein serligan hátt um ein flytur langt vekk, siga tær báðar.

Báðar tvær ætla sær tó heimaftur eftir eina tíð, men sambært Eriku Hayfield, granskara á Fróðskaparsetri Føroya eru tað fleiri, sum hóast tær ætla sær heimaftur, enda við at búgva uttanlands.

Linda Mortansdóttir og Fríða Marjunardóttir eru tvær av teimum, sum fóru uttanlands at lesa men ikki komu aftur.