Stórt trygdarbrot á talgildum íløgupalli

Dagført kl. 15.55: Trygdarbrotið á Nordnet er nú rættað.

Talgildi íløgupallurin, Nordnet, sum fleiri føroyingar eisini brúka, hevur fyrrapartin sent út fráboðan um stórt trygdarbrot.

Á Nordnet verða virðisbrøv keypt og seld.

Brúkarar á íløgupallinum hava av misgáum fingið atgongd til kontur hjá øðrum fólkum, sum brúka Nordnet.

Hetta váttar Nordnet fyri Ekstra Blaðnum og DR.

- Vit kanna málið, og í løtuni er alt læst. Vit seta øll neyðug trygdartiltøk í nýtslu, sigur talsfólkið hjá Nordnet í Danmark, Jonas Melander.

Hvørki appin ella heimasíða rigga í løtuni.

Nordnet upplýsir, at tey ikki vita, hvat orsøkin til trygdarbrotið er, men talan er ikki um teldusníkar.

Dagføring, klokkan 15.15:

Nú rigga appin og heimasíða aftur.