Starvsnæmingurin og lærumeistarin hava saman gjørt ársins FMA-jinglu

Í sambandi við at árligu FMA-heiðurslønirnar verða lætnar í Varpinum í Klaksvík fríggjakvøldið 21. mars, høvdu fyriskipararnir útskrivað eina kapping um at skriva eina nýggja FMA-jinglu. 

Vinnararnir av jinglukappingini gjørdust Aron Højgaard og Jens L. Thomsen. 

Jinglan spretti burturúr, at hin ungi Aron Højgaard var í starvsvenjing hjá roynda tónleikaframleiðaranum og ljóðlistamanninum Jens L. Thomsen. 

"Mítt arbeiði snýr seg ofta um, at taka eitt tónleikaligt hugskot og gera tað til veruleika. Jinglukappingin var tí eitt gott høvi hjá Aron at fáa innlit í gerandisdagin hjá einum tónleikaframleiðara," greiðir Jens L. Thomsen frá.

"Vit brúktu gamlar synthar frá 70- og 80unum til at geva lagnum ein future retro dám, og um tú nærlurtar, so hoyrir tú fleiri ferðir eina sampling av einum einstøkum lógvabresti. Hetta gjørdu vit fyri at fagna (við lógvabresti) føroyskan tónleik og eisini sum eina áeggjan til áhoyrarunum til FMA í Varpinum at klappa."

Ein kensla av stórleika

Um jingluna sigur FMA arbeiðsbólkurin soleiðis, at hon er sera væl frágingin. 

"Jinglan er komponerað soleiðis, at hon fylgir grafikkinum í tíð og huglagi og inniheldur eyðkend melodisk elementir. Teir báðir hava leverað eina dynamiska jinglu í høgari góðsku, sum lurtarin kennir aftur, og so hevur hon eisini eina kenslu av stórheit (stórleika)."

Hartil heldur dómsnevndin, at jinglan hóskar sera væl inn í huglagið, sum FMA roynir at skapa við karmum, ljósi og framførslum.

Hoyr jingluna her niðanfyri: