Hava tørv á einum sjókaðali afturat

Í løtuni verður kannað, um møguleiki er fyri at fáa ein sjókaðal afturat út í heim, og tað arbeiðið verður liðugt í desember í ár.

Sum nú er hava Føroyar tveir virkandi sjókaðalar út í heim - Farice og Shefa 2-kaðalin.

Seinastu tvey árini hava vit upplivað, millum annað í Eystrasalti, at kaðalar eru kvettir av við vilja, og tí mugu vit eisini taka hædd fyri, at tað kann henda her, heldur Kristian R. Davidsen, stjóri í Føroya Tele.

Hann heldur tað vera átrokandi, at eitt oyggjasamfelag sum Føroyar hevur í minsta lagið tríggjar kaðalar út í heim.

Bjarni Kárason Petersen er landsstýrismaður í tilbúgvingarmálum, og hann tekur støðuna í álvara.

Í verjusemjuni fyri Arktis stendur millum annað at lesa, at møguleikin fyri at gera ein nýggjan kaðal til Føroya og Grønlands skal kannast, og hetta arbeiðið skal vera liðugt í desember í ár. Ísland hevur eisini víst áhuga at vera við í hesi verkætlanini.

Men ein tílík verkætlan kostar nógvan pening. Shefa 2-kaðalin, sum kom í 2007, kostaði umleið 140 milliónir krónur, men ein nýggjur kaðal verður nógv dýrari, sigur Kristian R. Davidsen.

Stjórin í Føroya Tele heitir tí á landsstýrið at raðfesta kritiska undirstøðukervið.

Landsstýrismaðurin er samdur við hesum, men at fleiri dýrar verkætlanir standa fyri durðum. Bjarni Kárason Petersen sigur, at skal ein tílík verkætlan gerast veruleiki, so skulu fleiri partar vera við.