560 milliónir fleiri lønarkrónur seinasta árið

560 milliónir kr. fleiri vóru goldnar í lønum frá mars í fjør til februar í ár, enn í sama 12 mánaða skeiði frammanundan. Vøksturin er 4,6 prosent.

Tað vísa tøl hjá Hagstovuni.

Tilsamans vóru goldnar slakar 12,8 milliardir krónur í lønum, frá mars í fjør til februar í ár.

Kvinnur eiga størsta vøksturin

Kvinnur eiga meira enn 60 prosent av lønarvøkstrinum í tíðarskeiðnum, ella 354 milliónir kr. 

Av hesum áttu kvinnur, sum arbeiða hjá almennum arbeiðsgevarum, 318 milliónir kr. 

Tølini hjá Hagstovuni vísa, at størsti lønarvøksturin hevur verið í Sandoynni, 8,2 prosent, men minsti vøksturin var í Suðuroynni, 2,4 prosent. 

"Landbúnaður, skógrøkt og fiskiveiða" og "Framleiðsluvinna" hava sum tær einastu vinnugreinarnar havt minking í útgoldnum lønum.

Afturgongd hevur m.a. verið í uppsjóvarveiðu, har útgoldnu lønirnar vóru 100 milliónir krónur, ella 16 prosent minni, seinastu 12 mánaðirnar samanborið við undanfarna 12 mánaða skeið.