Bót fyri harðligan atburð

Tað hevur verið hampiliga friðarligt hjá løgregluni seinasta samdøgrið. 

Tó var ein tikin í Norðragøtu seint í gjárkvøldið fyri rúsdrekkakoyring. Hann blásti omanfyri tað loyvda, og var tí handtikin og tikin við til Havnar, har blóðroynd varð tikin av honum. Hetta er vanlig mannagongd í slíku støðum, sigur vaktleiðarin á løgreglustøðini í morgun.

Løgreglan hevur eisini vitjað á skeinkistovum, og har stóð hampiliga væl til.

Tíðliga í morgun fingu tveir menn bót fyri at vísa harðligan atburð, teir tókust í so harðliga, - og tað er brot á skilhaldsreglurnar. Fyri tað fáa teir 3.000 krónur í bót í part.

Og stutt fyri kl. 6.30 í morgun var eitt ferðsluóhapp á Kjalnestanga í Kollafirði, har ein bilur rendi á bilverjuna. Illgruni var um, at maðurin var ávirkaður av rúsdrekka. Hann blásti yvir tað loyvda, og var handtikin og fluttur til Havnar, har blóðroynd varð tikin av honum.