Pauli stemplaði inn í røttu løtu: - Tað var fantastiskt

Málverjarnir vóru munurin á Føroyum og Kosovo stóran part av dystinum í Pristina hóskvøldið.

Meðan tann úr Kosovo bjargaði ferð eftir ferð, eydnaðist tað mestsum ikki Paula Jacobsen at bjarga nørkum sum helst.

 - Eg var langt vekk frá nógvum bóltum. Eg stóð ein frýktiligan fyrra hálvleik við einari bjarging, og Sasha (Lacok, blaðm.) kemur so inn og ger tað øgiliga gott í seinna hálvleiki, segði Pauli Jacobsen.

Kortini ikki betri enn so, enn at venjarin Peter Bredsdorff-Larsen sendi fyrsta málverjan aftur á vøllin síðstu 10 minuttirnar, og tá bragdaði av álvara.

 - Hann segði, at tú kemur inn at avgera dystin, og tá visti eg, at eg skuldi nokk avgera. Tað var fantastiskt, segði málverjin, sum legði afturat, at nú fara teir eftir fyrsta plássinum sunnudagin.

Tað gera teir við javnleiki ella sigri á Ukraina.