Veiðigjøldini niður í helvt

Lutfalsliga lítla heildarkvotan av norðhavssild fær nú eisini avleiðingar fyri landskassan.

Føroysk skip kunnu í ár fiska 27.985 tons av norðhavssild. Tað er minni enn helvtin av tí, sum tey kundu fiska av norðhavssild í fjør. Og tað er eisini so mikið nógv minni enn sildakvoturnar síðstu árini, at grein-7 í veiðigjaldslógini kemur í gildi.

Grein-7 sigur, at "Fer tøka kvotan, sum er sett av til fiskifør undir føroyskum flaggi at fiska, undir 50% av miðal tøku kvotuni, sum er sett av til fiskifør undir føroyskum flaggi at fiska seinastu 5 árini, lækkar veiðigjaldið, tað árið, kvotan er galdandi, niður í 50% av veiðigjaldinum."

Niður í 59 oyru

Tá veiðigjaldið varð ásett við kunngerð í fjørsummar, varð gjaldið fyri sild ásett til 1,18 kr fyri hvørt fiskað kilo í rundari vekt.

Men um dagarnar kom Fíggjarmálaráðið við nýggjari kunngerð, har veiðigjaldið fyri sild er lækkað niður í helvt, 59 oyru fyri kilo.

Hóast kunngerðin er lýst 3. juni, so hevur hon virknað frá 1.januar í ár, og er galdandi til 31. juni, tá veiðigjøldini á uppsjóvarfisk skulu ásetast av nýggjum fyri næstu 12 mánaðirnar.

Fyri landskassan merkir tað, at veiðigjaldið frá norðhavssildini ikki verður 33 milliónir, men 16,5 milliónir krónur, hetta tíðarskeiðið.