Ríkisfundur í Tindhólmi

Ríkisfundur verður í Føroyum í dag.

Kl. 10 fara Aksel V. Johannesen, løgmaður, danski forsætisráðharrin Mette Frederiksen, og grønlendski landsstýrisformaðurin Jens-Frederik Nielsen við fylgi í báti út í Tindhólm, har tey skulu umrøða samstarvið í ríkisfelagsskapinum og kunna um búskaparligu og politisku gongdina í londunum.

- Tað hevur týdning, at londini møtast regluliga á ráðharrastigi. Vit arbeiða saman á fleiri økjum, ikki minst nú trygdarpolitiska støðan í heiminum er broytt. Haraftrat skulu vit eisini tosa um ríkisrættarligu viðurskiftini millum londini, og arbeitt verður eisini miðvíst eftir, at Føroyar fáa størri uttanríkispolitiskar heimildir, sigur Aksel V. Johannesen, løgmaður, sambært heimasíðuni hjá løgmansskrivsstovuni.

Aksel V. Johannesen og Jens-Frederik Nielsen

Aksel V. Johannesen, løgmaður, og Jens-Frederik Nielsen, landsstýrisformaður í Grønlandi. (Mynd: Bjarni Árting Rubeksen)

Samstarvsráðið fund í morgin

Í morgin verður fundur í samstarvsráðnum, har londini millum annað umrøða uttanríkis- og trygdarpolitisku støðuna.

Á hesum fundinum vera fyri Føroyar Aksel V. Johannesen, løgmaður
Sirið Stenberg, landsstýriskvinna í uttanríkis- og vinnumálum
Ruth Vang, landsstýriskvinna í fíggjarmálum
Bjarni K. Petersen, landsstýrismaður í lógarmálum

Danmark
Mette Frederiksen, forsætisráðharri
Troels Lund Poulsen, verjumálaráðharri
Lars Løkke Rasmussen, uttanríkisráðharri
Peter Hummelgaard, løgmálaráðharri

Grønland
Jens-Frederik Nielsen, landsstýrisformaður í Grønlnadi
Múte B. Egede, landsstýrismaður í fíggjarmálum
Vivian Motzfeldt, landsstýriskvinna í uttanríkis- og granskingarmálum

Um ársskiftið tóku Føroyar við formansskapin í samstarvsráðnum.  Londini skiftast um at vera vertir fyri fundunum, og hesa ferð verða teir hildnir í Føroyum.