Bara uttanríkispolitikkurin skal broytast

- Mítt støði er, at vit broyta felagsskapin soleiðis, at hann verður millum javnbjóðis lond, so Føroyar fáa neyðugu uttanríkispolitisku heimildirnar, meðan alt annað heldur fram óbroytt.

Tað sigur Aksel V. Johannesen, løgmaður, í svari til Bárð á Steig Nielsen, løgtingsmann, sum spurdi um tjóðarsemjuna millum allar flokkar uttan Sambandsflokkin.

Uttanríkispolitiskar heimildir eru neyðugar skulu Føroyar fáa limaskap í altjóða felagsskapum, sigur løgmaður.

Hann nevnir WTO, NEAFC, NAFO, EFTA og Norðurlandaráðið.

Verður niðurstøðan hjá grein seks nevndini, sum kannar, um Føroyar kunnu gerast limur í heimshandilsfelagskapnum WTO, at tað kunnu Føroyar, verður hon bara galdandi fyri WTO, sigur løgmaður.

Hon broytir ikki ta sannroynd, at flestu altjóða felagsskapir bara eru fyri sjálvstøðug lond, leggur hann aftrat.