Anna prinsessa setur oyggjaleikirnar

Tað verður Anna prinsessa av Stórabretlandi, sum skal seta Oyggjaleikirnar í bjørtum sólskini á Orknoyggjum seint seinnapartin.

2000 ítróttafólk frá teimum tilsamans 24 oyggjasamfeløgunum vera til staðar, til siðbundnu setanina, sum skjýtur oyggjaleikirnar í gongd.

Góðir 70 føroyskir íðkarar umframt venjarar og hjálparfólk eru partur av hátíðarhaldinum, og tey bæði í høvuðsleiklutinum vera Oddvør Alberta Kimsdóttir og Róland Toftum.

Oddvør Alberta Kimsdóttir er 13 ára gomul og ger fimleik. Hon er yngsti føroyski íðkarin og skal sambært føroysku siðvenjuni bera føroyska vatnið.

Róland Toftum er kendur svimjari, sum hevur kappast á fleiri oyggjaleikum, men í ár skal hann ikki í hylin sjálvur, men er við sum venjari. Afturat hesum skal hann bera Merkið til setanina.

Setanin kann stroymast á heimasíðuni hjá oyggjaleikunum: https://www.orkney2025.com/