Jónas smakkaði aftur søta sigurin

Allir føroyingarnir á Picky-leikvøllunum á Orknoyggjum fegnaðust, sum var tað 2023 á Footes Lane í Guernsey.

Tá spurtaði Jónas G. Isaksen seg inn í tilvitskuna hjá føroyingum við at vinna 400 metur renningina, sum hann síðan ognaði mammu síni, sum hann hevði mist eitt ár frammanundan. 

Eftir tað hevur hann verið í einum aldurdali, har hann hevur verið darvaður av skaðum og kanska hevur latið manglandi úrslit órógva, men mánakvøldið minti hann føroyingar - og kanska seg sjálvan á - at ferðin framvegis býr í kvívíksbeinunum.

Gamaní, tíðin var ikki eins góð og í Guernsey, tá hann tók oyggjaleikametið - verri enn so, men at síggja hann yvirhála mótstøðumenninar á síðstu 100 metrunum, mundi glaða allar liðfelagarnar og vinirnar, sum stuðlaðu við rópum av langsíðuni.

Uttan tey, var hann ikki komin so langt, viðgekk Jónas G. Isaksen eftir renningina. Tað eru tey, hann framvegis rennur fyri. - Og mamma er altíð við, segði hann.

Fekk kapping frá Dánjali

Tað var ikki fyrrenn á síðstu 100 metrunum, at kviki kvívíkingur setti "í níggjunda gear", sum hann málbar seg, og kom á mál fremstur við tíðini 48.79.

Hann fekk harða kapping frá Bobby Laurenson úr Hetlandi, men eisini frá einum øðrum rennara við Merkinum á búnanum.

Dánjal Dahl Ljósheim lá væl fyri á 200 metrum og var eitt sindur vónbrotin, tá bronsan kom um hálsin. Tað hevði hann eisini orsøk til at vera; hann hevur runnið undir 49 sekund fleiri ferðir í ár, og nú var tíðin 49.06.

Nakrar harðar innleiðandi kappingar sita kanska í beinunum, helt venjarin Heri Ziska, sum var sera væl nøgdur við teir báðar føroyingarnar á Picky-leikvøllunum. Tað kundi eins væl verið Footes Lane í Guernsey.