Vinmenn í finalu: Nikkel basti Jóannesi í gýsara

Nikkel Petersen vann sannan gýsara ímóti vinmanninum og liðfelaganum Jóannesi Poulsen í finaluni í compound-bogaskjóting seinnapartin mikudagin.

Finalan var sera spennandi. Teir skiftust um at vera frammanfyri, men tá síðsti pílurin var skotin var støðan 142-141 til Nikkel Petersen, sum tryggjaði sær sína triðju gullmedalju á leikunum. 

Somikið væl gekst hjá Nikkeli Petersen, at hann setti nýtt oyggjaleikamet við 146 av 150 møguligum stigum í áttandapartsfinaluni. Tapandi finalisturin, Jóannes Poulsen, kann troysta seg við, at hann feamvegis eigur føroyska metið upp á 148.

Silvur til Anju og Hans Petur

Føroyingar vóru eisini í finalunum í compound við kvinnum og recurve við monnum.

Har hepnaðist ikki so væl, tí Hans Petur Højgaard tapti greitt 6-2 fyri mótstøðumanninum av Falklandsoyggjunum, meðan Anja Eydnudal mátti lúta fyri sera royndu Zoe Gray úrGuernsey, sum vann 137-132.