Haltandi Tórur fekk gullið í longdarlopi

Við einum lopi upp á 7.40 metrar vann Tórur Mortensen gullið í longdarlopi á Picky-leikvøllunum í Kirkwall í kvøld.

Hann stríddist eitt sindur í fyrstu umførunum, men í fimtu royndini riggaði, og so var sigurin ikki í vanda. Verri var, at hann meiddi sær fótliðið í sætta lopinum, tá einki stóð upp á spæl.

Stafettirnar eru kortini ikki í vanda, helt Tórur Mortensen, sum ætlaði sær at røkka oyggjaleikametinum upp á 7.73, sum gotlendingurin Mattias Sunneborn eigur.