- Okkara harða arbeiði seinastu árini hevur lønt seg

Venjarin hjá fimleikakvinnunum stríðist við at halda gleðistárunum aftur eftir seinastu fimleikakappingina á oyggjaleikunum. Eisini í henni vunnu Føroyar gull. Tað var Marin Danielsen, sum hevði bestu framførðsluna á gólvinum, sum tryggjaði Føroyum gullið, og beint í hølunum á henni var Mia Højgaard, sum gjørdist nummar tvey. 

- Eg eri so glað fyri, at ta gekk so væl hjá mær á gólvinum, sigur Marin Danielsen. 

Venjarin hjá føroyska kvinnuliðnum, Camelia Michaela Mindricel, hevur bara gott at bera ungu kvinnunum. 

- Eg eri so stolt av teimum, og eg haldi, at alt okkara arbeiði seinastu árini hevur víst seg her. Ein av mínum uppgávum var at syrgja fyri, at Føroyar kundu síggjast millum tey bestu í heiminum. Fantastiskur ítróttur, fantastisk fólk, sum eg havi funnið í Føroyum. Tær hava vón um at vinna, og eg eri so stolt av lítlu oyggjunum, og at tær hava megnað hetta.

Føroyar hava vunnið oyggjaleikirnar í 2025, og tað er ikki minst fimleikinum at takka. Tey bæði fimleikaliðini vunnu heili 15 gull, átta silvur og seks bronsur.