Alivinnan rindar ongan serskatt næsta ár

Serskatturin á alivinnuna, sum var ásettur í breiðari semju millum samgonguflokkarnar og Sambandsflokkin í fjør, gevur einki næsta ár.

Tað er lági laksaprísurin, sum er orsøkin til, at einki kemur inn í skatti.

1. januar kom nýggja tøkugjaldsskipanin í gildi, har partur av tøkugjaldinum skal vera serskattur, í staðin fyri tøkugjald. 

Johnny í Grótinum

Johnny í Grótinum. (Mynd: Bjarni Árting Rubeksen)

- Men til ber longu nú at siga, at einki kemur inn í serligum skatt frá alivinnuni næsta ár, sigur Johnny í Grótinum, formaður í Búskaparráðnum, sum legði heystfrágreiðingina fram í gjár:

Eisini í ár liggja inntøkurnar frá alivinnuni niðan fyri tað, sum landsstýrið upprunaliga metti í fíggjarlógini fyri 2025.

Samgongan roknaði upprunaliga við, at 250 milliónir k. fóru at koma inn, men Búskaparráðið heldur at talan er um 150 milliónir, sum koma inn í tøkugjøldum í 2025.

Fíggjarmálaráðið hevur nýliga tillagað inntøkumetingina til 180 milliónir.

Hallið á fíggjarlógini verður sambært Búskaparráðnum 390 milliónir í 2025. Tá eru støðlaðar útreiðslur fyri 150 milliónir krónur roknaðar uppí umframt endurskoðað inntøkumeting fyri alivinnuna.