Strandfaraskip kosta nógv at umvæla

Tey smáu skipini eru dýr hjá Strandferðsluini, bæði tey nýggju og gomlu.

Sambært frágreiðingini hjá Landsgrannskoðanini kostaðu umvælingar og røkt av Erlu Kongsdóttur 5,1 millión krónur í 2023.

Av tí at talan var um skaða, kom tryggingin uppí, og hon rindaði umleið helvtina, ella 2,3 milliónir krónur til Strandferðsluna.

Eitt annað skip, sum hevur kostað meira enn ætlað hjá Strandferðsluni, er Ritan. 

Í 2023 var umvæling av Rituni ikki boðin út alment.

Strandferðslan bað um tilboð frá teimum fýra veitarunum í landinum, ið kundu gera arbeiðið. Tvær fyritøkur góvu tilboð, sum bæði lógu um 600.000 krónur. 

Strandferðslan tók av lægra boðnum. Tá ið avtornaði rindaði stovnurin slakar 1,8 mió. kr. fyri arbeiðið.

Sambært Strandferðsluni er tað rættiliga vanligt við gomlu skipunum, at arbeiðið verður meira umfatandi enn væntað.

Les frágreiðingina frá landsgrannskoðanini her.