Eggja innløgdum sjúklingum at røra seg meira

Kann tøkni viðvirka til at innlagdir sjúklingar gerast meira kropsliga virknir?

Tað verður í løtuni kannað á Landssjúkrahúsinum.

- Mann veit, at sjúklingar, sum verða innlagdir, og sum annars ikki feila nakað kroppsliga sum til dømis beinbrot ella heilabløðing, verða lagdir í eina song, og har verða teir liggjandi. Og hetta kann vera vandamikið fyri sjúklingarnar, tí teir blíva ofta verri fyri av ikki at røra seg, sigur Durita Viderø Gunnarsson, sum er fysioterapeutur og P.hD-lesandi og  knýtt at Heilsugranskingareindini í sjúkrahúsverkinum.

Síðani tíðliga í vár hevur Durita Viderø Gunnarsson granskað í týdninginum av, at innlagdir sjúklingar røra seg meira.

- Kanningar vísa, at innlagdir sjúklingar liggja í songini í upp til 23 tímar um døgnið, og tá er mann í øktum vanda at fáa eitt nú blóðtøppar, lungnabruna, vøddarnir vikna, balansan versnar, kognitivir førleikar versna og so framvegis, greiðir Durita Viderø Gunnarsson frá.

Í sambandi við árligu Vísindavøkuna, sum er fríggjadagin, setir morgunsendingin hesa vikuna sjóneykuna á ymiskar granskingarverkætlanir. Hetta var tann fyrsta.