Venjarin: Vit flyta okkum rætta vegin

Steypasigurin á KÍ er tekin um, at HB flytir seg rætta vegin, segði Lukasz Cieślewicz eftir finaluna á Tórsvølli leygarkvøldið.

Fyrrverandi stórspælarin rósti spælarunum fyri innsatsin ta tíðina, hann hevur verið venjari, og segði at gullið var uppiborin løn fyri stríðið, sum tær hava lagt í venjing og dystir farnu árini.

 - Frá fyrsta degi hava tær vilja flutt seg, og tær hava verið so disiplineraðar, og tí fáa tær okkurt fyri harða arbeiðið hjá sær, segði Lukasz Cieślewicz.

HB hevur vant taktiskt í tvær vikur fram ímóti finaluni, viðgekk venjarin, sum helt, at tað kom teimum til góðar, at tær spældu landskappingardyst ímóti KÍ seinasta vikuskiftið, hóast HB tá tapti 4-1 í Klaksvík.

 - Kanska tað kom okkum til góðar, at vit kundu royna ymiskt, meta um tað og laga tað til. Eg haldi, at dystarætlanin riggaði væl, segði venjarin.

HB vardi væl ímóti longu sendingunum hjá KÍ, og tí var nóg mikið við tí eina málinum, sum Rúna Jacobsen skeyt eftir horna, tá lítil hálvur tími var spældur.