KÍ føroyameistari eftir sigur á Dungasandi

Kí er aftur føroyameistari í bestu fótbóltsdeildini við monnum. 

Klaksvíkingar tryggjaðu sær FM-gullið við at vinna 2-1 á 07 Vestur á útivølli, og so var líkamikið, at bæði NSÍ og HB vunnu sínar dystir, tí KÍ er sjey stig fremst við bert seks stigum eftir at spæla um.

Árni Frederiksberg legði KÍ framum tríggjar minuttir eftir steðgin, men 07 Vestur tók øll á bóli, tá Casper Gedsted Hansen javnaði í 58. minutti. NSÍ legði seg framum seint í dystinum ímóti B36 í Runavík, og eina løtu sá út til, at FM-veitslan hjá klaksvíkingum aftur mátti útsetast.

So var kortini ikki. Eitt hitt sterkasta samstarvið í føroyskum fótbólti nógv tey seinastu árini - Árni Frederiksberg og Páll Klettskarð - syrgdi nevniliga fyri sigursmálinum, sum Páll Klettskarð setti í málið eitt korter fyri leiklok.

Talan er um fimta meistaraheitið, síðan nýggja stórtíðin hjá KÍ-monnunum byrjaði við FM-heitinum í 2019. Hesi árini hava bert HB og Víkingur megnað at stungið seg upp ímillum í sigursrøðini hjá teimum í Klaksvík.

Meistaraheitið er hitt 22. í røðini hjá KÍ, og bert HB við 24 hevur vunnið meir.