Avhoyra nú fólk í málinum um hekkuportrið á Galaxy

Herfyri meldaði Sjóvinnustýrið málið um opna hekkuportrið á Galaxy til løgregluna. 

Tað hendi eftir, at fleiri vitni trinu fram alment og váttaðu, at hekkuportrið var á gloppi 1. september í ár, hóast Strandferðslan hevði víst hesum aftur.

Michael Boolsen, fúti, váttar, at tær fyrstu innleiðandi avhoyringarnar eru gjørdar, men hann vil einki siga um, hvussu nógv eru avhoyrd, ella hvussu nógva kunnu vænta at verða avhoyrd.

Tíðarkrevjandi

Hann sigur, at málið er av tekniskum slag, og tað ger viðgerðina rættiliga tíðarkrevjandi. Tað hevur við sær, at Sjóvinnustýrið eisini má inn í myndina.

Fútin vil ikki siga um tíðarkarmin, men at málið verður raðfest.

Smyril er farin í sigling aftur á suðuroyarleiðini, men Galaxy er ikki farin av landinum.