Tubbaksídnaðurin hevur skift ham

Tað sigur Snorri Patursson, fólkaheilsusamskipari í Heilsustýrinum í sambandi við, at Heilsustýrið og Fróðskaparsetrið skipa fyri ráðstevnu um nikotin og tubbak.

- Vit hava leingi ynskt at varpa ljós á tubbak og nikotin. Serliga í mun til børn og ung er tað ungdómurin, sum er blivin stórbrúkari av nikotinvørum. Vit síggja tað m.a. í innflutninginum av snúsvørum. Og vit síggja eisini, at sniðgevingin av hesum vørunum soleiðis, at eingin ivi er um, at tað er málrættað til børn og ung. Tað sær út sum bomm, tað smakkar av bomm, tað angar av bomm, men tað oyðuleggur barnaheilan.

Ov lætt hjá børnum og ungum
Tað er eisini ein trupulleiki, at nikotinvørur eru ov lætt atkomiligar hjá børnum og ungum, heldur fólkaheilsusamskiparin. Hann hevur borið merki við, at hann hevur sæð nikotin í føroyska ítróttarumhvørvinum longu í 2014. Har sá hann, at snús er púra vanliga partur av tí at íðka. Tað er so nógv lættari at brúka snúsposar, enn tað t.d. er at roykja eina sigarett.

- Hetta er tubbaksídnaðurin í einum nýggjum hami, sum roynir at hava brukarar at halda, at nýggju tubbaksvørurnar eru minni skaðiligar. Men hetta er, sum Charlotta Pisinger, professari í tubbaks- og nikotinfyribyrgjan, eisini sigur, at tubbaksídnaðurin grætur síni krokodillutár. Tí hesar vørurnar eru málrættað til børn og ung, og nógv av teimum høvdu aldri byrjað at roykt, um tey ikki vóru krøkt av nikotini.

Ráðstevnan verður í Kongshøll hósdagin fyrrapart. Heilsustýrið og Fróðskaparsetrið skipa fyri. Mikudagin verða tvey onnur tiltøk um tað sama. Eitt er málrættað foreldrum, og hitt er ætlað til skúlar.