Granskingarverkætlan um trygd og verju

Tað er blivið vanligari at síggja kavbátar, krígsskip og hernaðarflogfør í Føroyum seinastu tíðina. Men hvat gera vit, tá okkurt óhugsandi hendir, sum skakar trygdina í Føroyum? Tað fer ein granskingarverkætlan við Rógva Olavson á odda at snúgva seg um. 

Ein granskingarverkætlan á Setrinum hevur fingið játtað 3 milliónir til at granska í sivilari verju og váðaplanlegging. Tað er eitt samstarv millum setrið og granskingarstovnar í Grønlandi og Danmark. Játtanin kemur úr einum grunni, sum hevur til endamáls at skapa nýggja vitan um uttanríkis-, trygdar- og verjupolitikk í Norðuratlantsøkinum. 

Granskingin fer at kortleggja tað tilfeingi vit hava í Føroyum - hvar førleikarnir eru í samfelagnum og hvussu man kann brúka tað í einari óvæntaðari støðu. 
"Úrslitið av granskingini skal koma samfelagnum til góðar," sigur Rógvi Olavson. Hon skal hjálpa at bjálva samfelagið og gera okkum meira mótstøðufør ímóti hóttanum og hendingum. Eisini skal hon geva eitt íkast til politiska og almenna orðaskifti.