Prísirnir á sethúsum og íbúðum hækka framvegis

Sethúsaprísirnir halda fram at hækka.

Seinastu tíggju árini eru prísirnir á sethúsum í høvuðsstaðnum og í Suðuroy og Sandoy tvífaldaðir, og tað eru eigaraíbúðirnar í høvuðsstaðnum eisini. Og í stóru og smáu bygdunum eru teir nærum trífaldaðir.

Tað skrivar Landsbankin.

Landsbankin vísir til hagtøl hjá Føroya banka, sum vísa, at miðal sethúsaprísurin í høvuðsstaðnum higartil í ár er 4,4 milliónir krónur, og hann er 3,1 millión krónur fyri eigaraíbúðir. 

Tølini eru uppgjørd fram til 3. ársfjórðing, men tey eru fyribils, og tí kunnu broytingar koma fyri.

Sethúsaprísir

2,6 mió. í størru bygdunum

Í størru bygdunum er miðalprísurin 2,6 milliónir krónur, og í smærru bygdunum er hann 2,1 millión krónur. Í Suðuroy og Sandoy, sum eru bólkað saman, er miðalprísurin fyrstu tríggjar ársfjórðingarnar í ár 1,2 milliónir krónur, skrivar Landsbankin.

Landbankin veit eisini at siga, at tey dýrastu fimm prosentini av sethúsunum, sum eru seld í Havnini higartil í ár, eru farin fyri umleið 5,8 milliónir krónur í miðal. Og tey dýrastu fimm prosentini av íbúðunum, sum eru seldar í høvuðsstaðnum, eru seldar fyri 4,4 milliónir krónur í miðal.

Dýrastu íbúðirnar á bygd eru nakað bíligari, men tær dýrastu íbúðirnar eru farnar fyri 3,3 milliónir krónur í miðal.