Gevur ikki meining at stuðla einum nýggjum miðli

Landsstýrið skal ikki blanda seg upp í, hvørjir tíðindamiðlar eru, sigur Eirikur Lindenskov, blaðstjóri á Sosialinum.

Mikudagin skal uppskotið um miðlastuðul til viðgerð, og við uppskotinum hevur landsstýrið m.a. sett sær fyri at lata 30 prosent av miðlastuðlinum til ein nýggjan miðil.

Í hoyringssvari frá Føroya Blaðútgevarafelag til uppskotið  ávarar hann, saman við Jonhard Hammer, blaðstjóra á Dimmalætting og Jóhann Lutzen, blaðstjóra á Norðlýsinum, ímóti ætlanunum um at lata stuðul til ein nýggja miðil.

Brúk er ikki fyri einum miðli afturat, sigur Eirikur Lindenskov.

Í teimum 12 hoyringsskrivunum til uppskotið sæst eisini, at aðrir miðlar halda lítið um ætlanirnar um at lata stuðul til nýggjan miðil. M.a. er Portalurin, FM1 og Eysturoyarportalurin ímóti ætlanini.

Síðan uppskotið hevur verið til ummælis, eru broytingar gjørdar. Men framvegis standa ætlanirnar hjá landsstýrinum um nýggjan miðil við - nú skulu 30 prosent av stuðlinum latast einum nýggjum miðli, ístaðin fyri 40 prosent, sum upprunauppskotið segði.

Við Frihedsbrevet segði Eirikur í Jákupsstovu í farnu viku, at talan er um eitt politiskt ynski.

Men blaðstjórin á Sosialurin heldur, at politiska skipanin hinvegin skal stuðla miðlunum, sum longu eru.
 

Hoyr meira í innslagi í útvarpstíðindunum:

Í skrivligum boðum til Kringvarpið sigur Sirið Stenberg, landsstýriskvinna í mentamálum, at uppskotið er úrslit av politiskari semju í einum málið, sum hevur verið trupult at finna semju um.  

- Tað er ikki óhugsandi at nevndin ger broytingar, sigur hon.