Nú fer ikki at bera til at kæra navngivin heilsustarvsfólk

Nú skulu fólk í Føroyum fáa møguleika at kæra um alla sjúkugongd í føroyska heilsuverkinum.

Eitt uppskot er gjørt um at broyta lógina um kærur og endurgjald, tá ræður um viðgerð í heilsuverkinum.

Harumframt kemur víðkaða kærugongdin at virka sum verja hjá heilsustarvsfólki.

Broytingin er, at kærur sum meginregla vera viðgjørdar sum ein kæra um alla viðgerðargongdina, heldur enn sum kæra móti einum ávísum navngivnum heilsustarvsfólki, sigur landsstýrið. 

Einstaklingsmál

Bara í serligum førum kann Styrelsen for Patientklager avgera, at mál skal viðgerast sum einstaklingsmál móti navngivnum heilsustarvsfólki.

Tað verður gjørt, um mett verður, at viðkomandi í stóran mun hevur misshildið sínar skyldur.

Sambært galdandi lóg er bara møguligt at kæra eitt ávíst navngivið heilsustarvsfólk.

Tær kærurnar viðger Sundhedsvæsenets Disciplinærnævn. 

Samanumtikið verður mett, at verandi skipan er viðbrekin og ikki tænir sínum endamáli á nøktandi hátt, hvørki fyri fólk ella heilsustarvsfólk, sigur landsstýrið.