Fakfelag fekk álvarsliga átalu

Dátueftirlitið hevur givið Búskapar- og løgfrøðingafelagnum álvarsliga átalu um trygdarbrot.

Felagið boðaði sjálvt Dátueftirlitinum frá om trygdarbrotið.

Tað var í apríl í ár.

Brotið bleiv staðfest 10 minuttir eftir, at tað hendi.

Felagið sendi limum sínum tveir teldupostar við kunning og hevði í tí sambandi av misgáum sent viðkvæmar persónsupplýsingar. 

Øll, sum fingu teldupostin, kundu síggja, hvør annar hevði fingið hann.

Telduposturin var sendur 471 limum.

Gav innlit

Teir fingu so innlit í, hvørjir hinir limirnir í felagnum vóru. 

Dátuftirlitið staðfesti, at Búskapar- og løgfrøðingafelagið ikki fylgdi innanhýsis mannagongdum um trygdarbrot.

Umframt at áleggja felagnum at endurskoða mannagongdir og bygnaðarligu trygdina sum heild og at halda eitt tilvitskuskeið fyri viðkomandi fólk, valdi Dátueftirlitið eisini at geva felagnum álvarsliga átalu.

Fráboðanin um trygdarbrot var send Dátueftirlitinum fimm dagar eftir, at brotið var staðfest. 

Freistin er, sambært dátuverndarlógini, 72 tímar, tríggir dagar.