Sissal er klár til leygarkvøldið

- Eg helt, tað fór at vera betri hesa ferð, men eg føli, at tað er eitt annað press í ár.

Soleiðis sigur føroyska sangarinnan, Sissal.

Nú leygarkvøldið klokkan sjey føroyska tíð er danska sangkappingin Melodi Grand Prix á skránni, og annað árið á rað er Sissal við.

Mikudagin kom Sissal til Frederikhavn, har stóra tónleikatiltakið fer fram í ár. Dagarnar áðrenn leygardagin hevur hon úr at gera við at royna pallin, ljóð, dans og klæðir.

Og hóast havnardaman var við í Melodi Grand Prix seinasta ár, er hon alt annað enn avslappað hesa ferð.

- Eg havi tað gott, men eg eri øgiliga nervøs, sigur Sissal, sum eftir ætlan hevur bæði familju og vinir í salinum, tá hon skal upptraðka leygarkvøldið.

Hóast hon ikki vil avdúka alt ov nógv um framførsluna leygarkvøldið, sigur hon, at hon hevur ein mannligan dansara afturat sær á pallinum, og at klæðiini, hon fer í, bera brá av ítrótti og leðri.

Í morgunsendingini greiðir Sissal frá seinastu fyrireikingunum.