Serlig vitjan í Vági: Roysningur í fjøruni

Vágbingar máttu gníggja sær í eygunum eina eyka ferð í morgun, tá teir sóu ein stóran roysning liggja vesturi við sandin í Vági. 

Roysningur, ella rosshvalur (norrønt hrosshvalr), heldur vanliga til norðuri í kalda Íshavinum og er tískil ikki ein vanlig sjón um okkara leiðir. 

Talan er um eitt stórt djór. Brimlarnir verða meira enn tríggjar metrar langir, opnurnar heldur minni. Húðin er 2,5 cm. tjúkk, og undir húðini er tjúkt spik.

Roysningur hevur sterkar og langar høggtenn. Tær vaksa so leingi, kópurin livir, og kunnu gerast meira enn 50 sentimentrar langar. 

Opnan leggur ein hvølp uppi á landi annaðhvørt ár, og hann heldur seg at mammuni tvey tey fyrstu árini.

Roysningar verða eini 40 ára gamlir. Hendingaferð hevur roysningur verið at sæð undir Føroyum.