Fleiri feilir uttan grannskoðan

Roknskapareftirlitið í 2025 gevur greiðar ábendingar um, at lutfalsliga nógv fleiri feilir eru staðfestir í útvaldum ársfrásagnum, stakroyndum, har grannskoðan er frávald.

Tað sigur Skráseting Føroya.

65 ársfrásagnir frá roknskaparárinum 2024 vóru kannaðar, 30, sum hava grannskoðara, og 35 uttan grannskoðara.

Skrásetingin fann fýra feløg, sum høvdu partaeigaralán. Tey eru ólóglig.

Partaeigaralán er millumrokning millum felagið og leiðslu, eigarar ella onnur nærstandandi.

Seks feløg høvdu ikki samsvar millum ársfrásøgnina og upplýsingar hjá Skrásetingini.

15 feløg, 14 íverksetarafeløg og eitt smápartafelag, vóru biðin um at koma við nýggjari ársfrásøgn, tí tær, sum vóru latnar, luku ikki treytirnar í ársroknskaparlógini. 

Á nýggjárinum 2024 vóru 4.232 feløg í partafelagsskránni.

63 prosent teirra vóru skrásett uttan grannskoðara.