Integratiónssamskipari fyri alt norðurøkið

Sóley Sjúrðaberg úr Leirvík er sett sum integratiónssamskipari fyri norðurøkið, sum fevnir um Fugloyar, Viðareiðis, Hvannasunds-, Kunoyar, Klaksvíkar, Fuglafjarðar og Eysturkommunu, skrivar Klaksvíkar kommuna. 

Í integratiónslógini frá desember 2024 er ásett, at hvør kommuna í seinasta lagi 1. juli 2026 skal hava integratiónssamskipara, sum skal menna integratiónstilgongdina, standa fyri integratiónsfremjandi tiltøkum og hava samband við tilflytarar.

Víðari heimilar lógin, at kommunur kunnu samstarva um integratión og samskiparar.

10.500 fólk

Í teimum sjey kommununum, sum nú hava sett integratiónssamskipara í starv, búgva tilsamans 10.500 fólk.

Sóley Sjúrðaberg er 41 ára gomul. Hon hevur masterprógv í heilsuvísindum, og hon hevur eisini útbúgving sum ergoterapeutur.

Hon tekur við starvinum 1. mai. 

Fasta staðsetingin er í Klaksvíkar kommunu, í samstarvi við allar kommunur í samstarvinum, og samskiparin fer eisini at hava regluligar arbeiðsdagar hjá teimum.