FSA-lærarar falla uttanfyri

- Føroyskt sum annaðmál er ikki ein gymnasial lærugrein, og tí er tað ikki skipað á sama hátt, og tað hevur skapt eina ávísa misnøgd.

Tað sigur Maria Chun Nielsdóttir, forkvinna í Yrkisfelagnum Miðnámi.

Í tíðindunum týskvøldið kom fram, at lærarar við útbúgving í føroyskum sum annaðmál virka undir sama sáttmála sum miðnámsskúlalærarar. Yrkisfelagið Miðnám metir tó ikki, at hesir lærarar eru útbúnir á støði við miðnámsskúlalærarar. Tí skal ein nýggjur leistur finnast, sum skal siga, hvussu arbeiðið skal skipast á pappírinum, millum annað hvussu nógv fyrireikingin skal telja, og hvussu lønin skal ásetast.

- Økið bleiv skumpað inn undir okkara øki, uttan at vit vórðu hoyrd ella spurd um nakað sum helst, sigur forkvinnan í Yrkisfelagnum.

Í tvey ár hevur Yrkisdleagið tí fundast við Undirvísingastýrið og Fíggjarmálaráðið um, hvussu hetta arbeiði kann skipast í sáttmálanum, men enn er einki hent.

Og meðan fleiri og fleiri tilflytarar koma til landið og hava tørv á undirvísing í føroyskum sum annaðmál, siga lærarar upp, sum detta ímillum í hesi skipanini.