Mentamálaráðið hevði fleiri ivaspurningar um fíggingina

Í skrivi til Føroya Stiftsstjórn, dagfest tann 29. mai 2026, ger Mentamálaráðið greitt, at fleiri viðurskifti máttu verða lýst betur, áðrenn landsstýrismaðurin kundi fáa tilmæli um at geva byggiloyvi.

Millum annað vildi ráðið hava prógv fyri, at ein endalig og bindandi avtala um søluna av gomlu kirkjuni fyrilá. Samstundis vildi ráðið hava nærri metingar av nútíðarvirðinum av sølupeninginum, rentumissi og eyka rentukostnaði, tí kirkjusóknin ikki fær sølupeningin, fyrr enn yvirtøkan fer fram.

Mentamálaráðið bað eisini um greiðari svar um, hvussu nógv byggikostnaðurin fór at hækka, nú arbeiðið ikki varð sett í gongd beinanvegin, hóast arbeiðssáttmáli varð undirskrivaður longu í 2024.

Harumframt bað Mentamálaráðið Føroya Stiftsstjórn um nærri upplýsingar um, hvussu meirvirðisgjald, sjálvboðið arbeiði og endurnýtt innbúgv vóru viðgjørd í uppgerðini av eginfíggingini, áðrenn ráðið kundi taka støðu til málið.

Í innlitinum síggjast tó eingin skjøl, sum svara hesum spurningum. 

Endaligt loyvi varð givið síðst í juli
Málsyvirlitið av innlitinum vísir, at tann 20. juli 2026 gav Mentamálaráðið tilmæli um at geva endaligt byggiloyvi. Dagin eftir tók landsstýrismaðurin undir við tilmælinum, og 22. juli varð endaliga loyvið sent Argja kirkju og Føroya Stiftsstjórn.

Skjølini, sum Kringvarpið hevur fingið innlit í, vísa sostatt, at Mentamálaráðið fram til síðst í mai framvegis hevði fleiri ósvaraðar spurningar um fíggingina. Tó sæst ikki í teimum útflýggjaðu skjølunum, hvat ítøkiliga broyttist, soleiðis at endaligt byggiloyvi varð givið 22. juli.