Miðlastuðulslógin skal broytast

Galdandi verkætlanarstuðulin til privatar miðlar, sum hevur verið seinastu fýra árini, riggar ikki.

Tað siga privatu fjølmiðlarnir, Sosialurin, Dimmalætting, Portal.fo/FM1, Norðlýsið og Vágaportalurin.

Fyrrapartin í dag heittu teir á løgmann um at broyta galdandi lóg um miðlastuðul, nú freistin um at søkja verkætlanarstuðul er úti mánadagin.

Verkætlanarstuðulin fer í søguna

Skipanin um verkætlanarstuðul skal burtur, siga teir fimm privatu fjølmiðlarnir.

Við galdandi verkætlanarstuðlinum kunnu miðlarnir søkja um stuðul til einstakar verkætlanir, sum Miðlastuðulsnevndin skal góðkenna, áðrenn stuðul verður latin.

Sambært privatu fjølmiðlunum, eigur Miðlastuðulsnevndin ikki at gera av, hvat miðlastuðulin skal brúkast til, men skal ístaðin gera av, hvørjir miðlar skulu fáa stuðul.

Blaðstjórarnir vilja aftur til gamla miðlastuðulin, sum var áðrenn verkætlanarstuðulin. Tá fingu miðlarnir stuðul í samsvari við lønarútreiðslur.

Løgmaður sigur, at verkætlanarstuðulin fer í søguna, og at lógin um miðlastuðul verður endurskoðað.

Sí meira í innslagi í Degi og viku.
 

Landsstýrismaðurin í mentamálum, Bárður á Lakjuni, vitjaði eisini í sjónvarpsstovuni.