Eingin skúlagongd í nýggja skúlanum í óásetta tíð

Áleið 130 næmingar í 7., 8. og 9. flokki kunnu í løtuni ikki fáa undirvísing í nýggja skúlabygninginum hjá Sankta Frans skúla, eftir at ein stórur vatnskaði er hendur í bygninginum.

Tað eru bert góð tvey ár síðani, at bygningurin, sum hýsir hádeildini, varð tikin í nýtslu. Nú er skaðin so umfatandi, at enn er óvist, nær næmingarnir kunnu koma aftur í skúla.

Leivur Frederiksen, varaskúlastjóri, og brandslangan, ið er upphavið til vatnskaðan í Sankta Frans skúlanum (Mynd: Símun Waag)

 

Einki herverk

Vatnskaðin kom av einari brandslangu, sum er farin frá. Enn er ikki greitt, hví tað hendi, men mett verður, at talan er um eitt brek og ikki herverk.

Í løtuni verður arbeitt við at fáa tamarhald á støðuni og kanna skaðan. Samstundis verður leitað eftir øðrum hølum til undirvísingina, og miðað verður eftir, at høli kunnu vera klár til næmingarnar í komandi viku.

Tórshavnar kommuna hevur ikki viljað gjørt viðmerkingar til málið í dag. Johan Syderbø, deildarleiðari á Bygningsdeildini, sigur tó við Kringvarpið, at nú verður kannað, hvat elvdi til stóra vatnlekan, og hvussu umfatandi skaðin er.

Vit vildu fegin spurt Tórshavnar kommunu, hvussu ein so umfatandi skaði kann henda í einum so nýggjum skúla.