Fløskupant sleppur undan meirvirðisgjaldi

Stjórin í IRF vónar, at hetta verður seinasti snávingarsteinurin, áðrenn pantskipan kemur í gildi

Panthøllin í Sandavági er klár at taka ímóti. Nú verður bíðað eftir lógarbroyting um meirvirðisgjald á fløskupanti.

Mynd: Bjarni Árting Rubeksen

25.09.2026 - 12:20

Í drúgva tíð hevur verið bíðað eftir henni - og í Sandavági stendur ein stór høll, púra klár at taka ímóti øllum tómu fløskunum, sum føroyingar smidliga skulu sleppa av við, á einum og sama stað.

Nú er áralanga málið tódnað niður til meirvirðisgjald á pantinum á tómu fløskuni.

Í gjár legði Aksel V. Johannesen, landsstýrismaður í fíggjarmálum, uppskot fyri løgtingið um at broyta mvg-lógina - ítøkiliga skal pant á fløskur setast inn sum eitt nýtt undantak í lógini.

Sigurd L. Lamhauge

Sigurd L. Lamhauge, stjóri í IRF, er farin at ótolnast eftir, at pantskipanin skal fara at virka. IRF er klárt at taka ímóti fløskum.

Sleppur undan mvg

Tað verður mett neyðugt at gera, tí meirvirðisgjaldið endar altíð hjá endabrúkaranum. Og í hesum føri merkir tað, at brúkarin til dømis rindar 2 krónur og 50 oyru í panti fyri eina sodavatnsfløsku - íroknað meirvirðisgjald - men fær bara tvær krónur aftur, tá tóma fløskan verður latin innaftur.

Nú verður pant á fløskur so ikki longur mvg-skyldugt.

- Vónandi verður hetta seinasti snávingarsteingurin, sigur Sigurd Lamhauge, sum stendur við einari stórari høll í Sandavági, har allar tómar fløskur eftir ætlan skulu savnast.

Hoyr innslag í útvarpstíðindunum:

25092026_Pantskipan