Vatnveitingin í Havnini er trygg

- Teldusníkar hava heilt sikkurt áhuga at spæla okkum eitt puss. Í sambandi við vatnveiting, so er stýringin av vatnverkinum á netinum. Tað vil siga, at ein hakkari kann potentielt koma inn og sløkkja tað.

Vatnveiting er at meta sum kritiskur infrastrukturur. Danska verjufregnartænastan metir, at vandi er fyri, at Russland fer at økja um talið av hybridálopum komandi tíðina. Og sambært felagsskapinum Danske vandværker hava 12 prosent av donskum vatnverkum verið álopin av teldusníkum.

Bjørn Holm er leiðari fyri vatnveitingina í Tórshavnar kommunu, og hann stúrir ikki fyri vatninum í høvuðsstaðarkommununi.

- Um teir koma inn, so kunnu teir sikkurt sløkkja tað eina løtu, men tað skal nógv til at koma inn. KT-trygdin er í fokus hjá kommununi. Har eru fólk, sum arbeiða burturav við, at tað skal vera so gott sum møguligt.

Bjørn Holm

Um tað kortini eydnast

Og skuldi tað kortini eydnast teldusníkum at komið inn í stýrisskipanina, so er kommunan eisini fyrireikað.

- So kunnu vit kopla alt frá, allar stýringar og alt frá, og koyra anleggið manuelt. Ella kunnu vit kopla tað av netinum og brúka stýringarnar innanhýsis á vatnverkinum, men ikki á netinum.

Sí innslag úr Degi og viku.