Nógvir pengar í tinginum í dag

Tingið fer at viðgera uppskotið um eykajáttanir í dag.

Uppskotið um eykajáttanir, sum landsstýrismaðurin í fíggjarmálum kom við, hevur 25,3 mió. kr. í halli.

Tað mesta, 24,3 milliónir netto, fer til rakstur.

Løgtingið er biðið um at hækka játtanina til 27 kontur í fíggjarlógini.

Tað er eisini biðið um at lækka hana til nakrar fáar kontur.

Jacob Vestergaard, landsstýrismaður, hevur biðið løgtingið um í mesta lagi 74,4 mió. kr. til fýra høvuðsmotorar hjá Smyrli.

Motorarnir skulu setast í í 2028, men teir mugu bíleggjast nú, sigur Vinnumálaráðið.

Skattabroytingar

Og tingið skal eisini viðgera uppskotið hjá landsstýrinum um broytingarnar í skattalógini.

Tær eru um samdøgursfrádrátt, uttanlandsfrádrátt, lønarflytingar og frádrátt fyri limagjald til fakfelag og fyri sosial gjøld í Norðurlondum.

Broytingarnar kosta slakar 70 mió. kr.

Seks fyrstu viðgerðir og tvær aðru viðgerðir eru á tingfundinum í dag.

Hann byrjar klokkan tíggju.