23 milliónir fyri øki til flogvøllin

Í dag og í morgin fer Føroya rættur at viðgera stóra endurgjaldskravið hjá einum haga í Sørvági móti Vinnumálaráðnum.

Kravið er góðar 23 mió. kr. Hagaparturin Ytri Suðurtriðingur  í Sørvági krevur pengarnar fyri lendið, sum hagin misti, tá flogvøllurin varð útbygdur.

Vinnumálaráðið er stevnt, tí tað stóð fyri ognartøkuni í 2010.

Lendið varð ognartikið, tí semja fekst ikki millum Vága Floghavn og hagapartin um gjaldið fyri lendið.

Vága floghavn bjóðaði hagapartinum tríggjar milliónir krónur. Tað var í 2009.

Talan er um 200.000 fermetrar av haga.

Føroya rættur hevur sett tveir dagar av til málið, tí nógv vitni skulu avhoyrast, og nógv skjøl skulu leggjast fram og viðgerast.