Løgtingið viðgera stýrisskipanina

Løgtingið fer at viðgera sjálva stýriskipanina í dag.

Tjóðveldi hevur trý uppskot um at broyta stýriskipanarlógina, og tey verða viðgjørd undir einum í dag.

Ætlanin er, at uppskotini síðani fara í Rættarnevndina.

At Tjóðveldi nú vil hava stýriskipanina broytta, merkir tó ikki, at flokkurin hevur slept dreyminum um eina føroyska stjórnarskipan, sigur Gunnvør Balle.

Fyrst á skránni eru ófráboðaðir fyrispurningar til landsstýrið.

Johan Dahl, landsstýrismaður í vinnumálum, vil hava løgtingið at viðgera og avgreiða uppskot um, at Atlantic Airways keypir aftur triðingin av partapeninginum, sum varð einskildur í november 2007.

Johan Dahl sigur, at full undirtøka var fyri uppskotinum á landsstýrisfundinum í gjár.

Løgtingið fekk uppskotið í gjár, og Johan Dahl hevur biðið um, at løgtingið víkir frá øllum tíðarfreistum í sambandi við hetta mál.

Tað er neyðugt, um uppskotið skal leggjast fram og avgreiðast á tingfundinum í dag.

Og hetta er neyðugt, tí Atlantic Airways er børsskrásett partafelag, sigur landsstýrismaðurin.

Tingfundurin byrjar kl. 11.