Eitt stig afturat til Føroyar

Føroyska kvinnulandsliðið fekk eitt stig afturat í hesi HM-undankappingini við málleysum javnleiki móti Norður-Írlandi í kvøld.

Úrslitið 0-0 lýsir dystin rættiliga væl, tí málmøguleikarnir vóru fáir.

Besta føroyska møguleikan fekk Anna Sofía Sevdal sum varð spæld leys móti málinum, tá 74 min vóru spældir. 

Málverjin hjá Norður-Írlandi, Emma Higgins, var skjót út úr brotssteiginum og fekk bjargað við andlitinum(!)

Norður-Írland kom ikki til nógvar málmøguleikar. Tá 62 min. vóru spældir, vóru tær tætt við, men Randi Wardum bjargaði væl.

Norður-Írland kom eisini til ein stóran møguleikan í yvirtíðini, men Malena Josephsen blakaði seg í eina takkling og fekk vart fyri.

Tordu ov illa at leypa á:

Føroyska liðið stóð sera væl í verjustøðu, og megnaði at halda Norðurírlandi frá møguleikum.

Munurin var lítil og eingin á liðunum, og tí var saknur í, at føroyska liðið royndi seg meira í álopspartinum.

Føroyska liðið valdi ov ofta, at sparka langar bóltar niðan, og tað var tórført hjá Heidi Sevdal at fáa nakað burtur úr tí.

Disiplinerað avrik

Tað sæst, at føroyska liðið er blivi munandi betri av at hava spælt fýra HM-undankappingardystir. Føroyska liðið helt seg til avtalurnar og gjørdi eingi mistøk.

Norðurírska liðið er nøkur pláss omanfyri Føroyar á UEFA-styrkislistanum, men tað sást ikki í kvøld, og tí bendir nógv á, at føroyska liðið mennist fyri hvønn dyst.