Tímalønin hækkar 4,80 krónur

2,20 kr. um tíman afturat 1.mai í ár og 2,60 kr. 1.mai næsta ár. Tað eru Føroya Arbeiðsgevarafelag og tey fimm arbeiðarafeløgini, Føroya Arbeiðarafelag, Havnar Arbeiðsmannafelag, Havnar Arbeiðskvinnufelag, Klaksvíkar Arbeiðsmannafelag og Klaksvíkar Arbeiðskvinnufelag, samd um.

Feløgini hava skrivað undir nýggjan tvey ára sáttmála, har tímalønin hjá arbeiðsfólki hækkar 4,80 kr. í sáttmálaskeiðinum, og eftirlønin hækkar upp í 10 prosent. 

Sersáttmáli

Hækkingarnar svara til ein karm, sum er 1,98 prosent í ár og 2,25 prosent næsta ár. Eisini er sersáttmáli gjørdur fyri alivinnuna, sum tryggjar, at laksur og smolt verða røkt, meðan arbeiðssteðgur er. 

Sáttmálarnir millum Arbeiðsgevarafelagið og arbeiðarafeløgini fóru úr gildi 1.mai, men teir vórðu longdir til á midnátt í gjárkvøldið, og um tveytíðina í nátt vórðu partarnir samdir og skrivaðu undir nýggjan tvey ára sáttmála.