Heilsumálaráðharrar gjørt samstarvsavtalu

Í gjárkvøldið skrivaði  Karsten Hansen, landsstýrismaður í heilsumálum undir samstarvsavtalu við íslendska heilsumálaráðharran, Kristján Tór Júliusson og grønlendska landsstýrismannin í heilsumálum, Sten Lynge.

Talan er um fyrstu avtaluna av sínum slag ímillum londini.

Tað var Karsten Hansen, sum í 2012 tók stig til ein heilsufund ímillum ráðharrarnar um árið, fyri at styrkja og menna samstarvið ímillum londini.

Tríggir fundir

Triði fundurin var í vár í Føroyum, har m.a. talgilda heilsuskipanin varð umrødd, eins og flutningur av sjúklingum.

Karsten Hansen, landsstýrismaður sigur, at Føroyar, Ísland og Grønland stríðast við fleiri av somu avbjóðingum á heilsuøkinum, m.a. við somu avbjóðingum til at fáa manning til ymsu økini í framtíðini, tá talan er um sjúkugreinan og viðgerð, sum verður alt meira spesialiserað. Tí hevur tað týdning at samstarva, fyri at fáa sum mest burturúr, sigur landsstýrismaðurin.