Strandferðslan noyðist aftur at fáa eykajáttan

Strandfaraskip Landsins brúkar framvegis meira pening, enn løgtingið hevur játtað, og tí er ein umbøn um eykajáttan á veg.

Hálvársroknskapurin hjá stovninum vísir, at hallið er góðar tríggjar milliónir krónur, og verður tað gongdin alt árið, verður meirnýtslan einar seks milliónir krónur, verða tiltøk ikki sett í verk.

Strandfaraskip Landsins høvdu meira enn fýra milliónir krónur í heimildarleysari meirnýtslu í fjør, og stórt rumbul stóðst av hesum. Stjórin varð koyrdur til hús, fíggjarleiðarin fekk ávaring fyri at hava boðað løgtingsins fíggjarnevnd frá óskilinum uttan um stjóran og Vinnumálaráðið, og endin varð, at landsstýrismálanevndin setti eina kanning í verk av Johan Dahl og hansara handfaring av málinum.

Fíggjarleiðarin koyrdur til hús

Játtanin til Strandferðsluna í ár er at kalla tann sama sum í fjør, og nú árið er meira enn hálvrunnið, er greitt, at játtanin heldur ikki røkkur í ár.

Nýggi stjórin á strandferðsluni, Hilmar Eliasen, hevur eisini tikið enn eitt stig móti fíggjarleiðaranum, sum hevur fingið hoyringarskriv um uppsøgn. Fíggjarleiðarin er sendur til hús.

Landsstýrismálanevndin er ikki komin á mál at kanna Johan Dahl, landsstýrismann, sum í næstai mánaði helst noyðist í løgtingið eftir meira peningi til Strandferðsluna.