Formaðurin ger av um samsýningin skal rindast

Tað er løgtingsformaðurin einsamallur, sum ger av, um tingið skal rinda samsýningina, Anfinn Vitalis Hansen krevur fyri tíðina, ið hann sat sum kanningarstjóri, áðrenn hann noyddist at leggja frá sær, tí rumbul tók seg upp um ógegni.

Tað váttar Jógvan á Lakjuni, løgtingsformaður fyri útvarpinum.

Í gjár kom fram, at hinir í formansskapinum - Alfred Olsen, Gerhard Lognberg og Páll á Reynatúgvu - ikki góðtaka rokningina, og allir vísa teir til vantandi habilietin hjá advokatinum, og at hann sjálvur átti at havt boðað frá sínum ógegni beinan vegin.

Hava einki við málið at gera

Jógvan á Lakjuni sigur, at hinir limirnir í formansskapinum einki hava við málið at gera, og at tað er hann, sum skal gera av, hvat nú skal henda.

Spurdur, um hann ætlar at fáa staðfest á røttum stað, um Anfinn Vitalis Hansen sambært reglunum var ógegnigur, sigur løgtingsformaðurin, at hann hevur onga viðmerking yvirhøvur.

Tað einasta, Jógvan á Lakjuni vil siga, er, at hann nú viðger málið saman við skrivstovuni hjá løgtinginum, men hann ikki veit at siga, nær komið verður til nakra niðurstøðu.