Tvær ferðir í tingið eftir pengum fyri 1.oktober

Eykajáttanarlógin, sum landsstýrið hevur arbeitt við tað mesta av hesari tingsetuni, verður løgd fram mikudagin í næstu viku.

Uppskotið hjá Fíggjarmálaráðnum varð viðgjørt á landsstýrisfundinum mánadagin. 

Fyri tveimum vikum síðani varð upplýst, at aðalráðini, sum brúka meira enn fíggjarlógin sigur, vilja hava 50 milliónir krónur í eykajáttanum í ár.

Tað kemur ikki upp á tal, svaraði Jørgen Niclasen, landsstýrismaður í fíggjarmálum.

- Hetta er alt í verðini ov nógvir pengar, segði Jørgen Niclasen.

Aðalráðini fingu tí boð um at endurskoða síni ynski og síðani senda Fíggjarmálaráðnum nýggj uppskot við lægri tølum enn í fyrstu uppskotunum. 

Tingfundur verður so aftur týsdagin 30.september kl.10.00, tí tá skal Jørgen Niclasen aftur í tingið at biðja um pengar, tá skal uppskotið um fíggjarlóg fyri 2015 leggjast fram.