Sea Shepherd á tingborð

Tjóðveldi skjýtur upp, at løgtingið skal heita á landsstýrið um at leggja fram lógarbroytingar, sum fyribyrgja, at einstaklingar og umboð fyri felagsskapir, ið hava sum fráboðað endamál at fremja ólógligt virksemi, koma til landið. Málið kemur til fyrstu viðgerð mikudagin.

Atvoldin til uppskotið er støðuga herferðin, almennu hóttanirnar og virksemið hjá felagsskapum sum Sea Shepherd, sum leggja seg út í lógligt virksemi í Føroyum, sigur Tjóðveldi í viðmerkingum til uppskotið.

Fólk hava rætt at koma til landið at mótmæla, men her er talan um fjøld av fólki og útgerð, sum bert hevur til endamáls at brúka ólógliga framferð og tilvitað elva til vandastøður.

At óttast fyri at halda grind til - ella at fara í grind undir løgregluverju - er als ikki ein støðu, sum til ber at liva við, sigur Tjóðveldi.