Kanska spurd aftur um tunnil fyrst í desember

Tey, sum eru avhoyrd í kanningini um privata Eysturoyartunnilin, biðin um at vera tøk 1. og 2.desember

Nógv skjøl eru at lesa hjá Hans Gammeltoft-Hansen og hansara fólki, sum kanna privatu verkætlanina um Eysturoyartunnilin.

Høgni Djurhuus

08.10.2014 - 06:58

Hans Gammeltoft-Hansen, sum kannar málið um privata Eysturoyartunnilin fyri løgtingið, hevur biðið Kára P. Højgaard og Kaj Leo Holm Johannesen, sum verða kannaðir, og hini, sum eru spurd um málið, um at seta kross í álmanakkan 1. og 2.desember.

Møguliga skulu tey hava fleiri spurningar frá kanningartoyminum. Verður neyðugt at spyrja meira, verður tað í Dómhúsinum í Havn 1. og 2.desember.

Ætlanin var eisini at spyrja Rune Bro Róin, stjóra í Copenhagen Infrastructure Partners, og Kurt Bardeleben, advokat, sum var ráðgevi hjá Innlendismálaráðnum, um teir kunnu svara spurningum frá kanningarstjóranum.

Enn er ikki greitt, um hetta verður av nøkrum.

Men verða teir báðir avhoyrdir, verður tað gjørt í Keypmannahavn. Eisini tær avhoyringarnar vera almennar.

Rune Bro Róin og Kurt Bardeleben vóru báðir virknir í málinum um Eysturoyartunnilin avgerandi dagarnar 24. til 28.juni í fjør.