Mascot sigldi á flúr við Kirkjubønes

Mascot sigldi heim úr íslendskum sjógvi, og var á veg inn á Toftir at landa, tá skipið rendi á ein flúr við Sveip á Kirkjubønesi. Hendingin fór fram nakað eftir klokkan 10 í fyrrakvøldið.

Reiðarin á Mascot, Jóhannus Martin Olsen, sigur við Kringvarpið, at manningin merkti, at teir bóru við okkurt, men tað bráðaði ikki frá nakrastaðni, og teir sóu heldur ongan skaða. Teir sigldu tí beint inn á Toftir at landa.

Boð eftir Tórshavnar Sløkkiliði

Á Toftum sendu teir ein kavara niður at kanna, um skaði var, og hann kundi staðfesta, at eitt lítið hol var undir botninum.

Mascot sigldi sjálvur til Havnar og varð í morgun tikin upp á skipasmiðjuna í Havn.

Har var sløkkiliðið tilreiðar við oljusperringum, so at tamarhald var á dálkingini, tá skipið var togað upp úr sjónum.

Boðaðu ikki frá

Hvørki MRCC, Fiskiveiðieftirlitið ella løgreglan vistu av, at Mascot hevði borið við land.

Spurdur, hví eingin boðar myndugleikunum frá hesum, sigur Jóhannus Martin Olsen, at tað var ikki neyðugt, tí vandi var ikki á ferð. Reiðaríið hevur tó boðað Tryggingini og Norsk Veritas frá óhappinum.

Tað hevur ikki eydnast okkum at fáa eina viðmerking frá Skipaeftirlitinum, hvat tað fer at gera við málið.