Barnaískoytið hækkar næsta ár

Barnaískoytið hækkar 843 kr. um ársfjórðingin næsta ár. Tað fer løgtingið at samtykkja í dag.

Tvey uppskot um júst tað sama komu í løgtingið 30.september, annað frá teimum fýra andstøðuflokkunum, og hitt frá landsstýriskvinnuni í almannamálum. 

Trivnaðarnevndin hjá løgtinginum mælir til at samtykkja at hækka barnaískoytið, so tað verður 2.500 kr. um ársfjórðingin. Barnaískoytið verður latið einsamøllum uppihaldarum, sum við lógarbroytingini fáa 3.412 kr. meira fyri hvørt barnið næsta ár enn í ár. 

Kostar fýra mió. kr.

Hækkingin fer, sambært Almannamálaráðnum, at kosta landskassanum fýra milliónir krónur í 2015.

Serligt barnaískoyti til einsamallar uppihaldarar kom 1.september í 2008. Tá var ískoytið 6.000 kr. um árið fyri hvørt barn. Í ár er barnaískoytið 6.588 kr., og næsta ár fer tað upp í 10.000 kr.